أكبر خطا تبذل معاريف في الناس

وترجي جزا رد المعاريف منها

أما افعل المعروف طيبٍ على ساس

والا معاريف البشر جوز عنها

وليا تجمّل طيّب الساس والراس

جمالته ماهو يدوّر ثمنها

وخلّك مع أهل الطيب للطيب نبراس

والأرزاق عند الله لخلقه ضمنها

وابعد عن الأنذال والناس الأنجاس

والعقربة تلدغك لو تحتضنها

وطويق له قمة ولا هيب تنداس

ولا شانت الأقدار كلٍ زبنها

لي وقفةٍ جنبك والأرياق يبّاس

لو صد بعض الناس ما صِد عنها

وتقطّعت من دونك اليوم الأرماس

يا جاحد الوقفه وناسي زمنها

واليوم أببعد عنك لا باس لا باس

غلطتك لابدّك وتدفع ثمنها

وهرج الخبول أكثر من ارمال الأطعاس

ويعيش راعي الكلمة اللي وزنها

وعلم المطر تلقاه مع كل عسّاس

ولا تخدم المهرة بليا رسنها

وأحلام نحلمها لنا كانت احساس

في خاطري يا خاطري من سجنها

الشاعر - حجاب بن فرج القحطاني