أنا صديق الطيبين المناعير
اللي لهم كسب المعالي عشاقه
حضر وبدو نطاحة الشر والخير
صادقتهم وأخذت منهم صداقة
حلالة المشكل كبار المخاسير
يا سعد منهم له عضود ورفاقه
زبن المخيف إلى رمته المقادير
بالجاه والا المال وإلا الحماقة
وأخذ من أرياهم قوي المشاوير
والطيبة ماهيب منهم شفاقة
مانيب أصادق ما يلين الدناقير
عيال العفون من الخيوط الدقاقة
اللي مجالسهم نميمة وتعبير
ما لي بهم من فضل ربي علاقة
فضلٍ من الباري حسين التدابير
ما نيب للأصحاب قطاع ساقه
ورزقي علي اللي بالسما ينهض الطير
يكسر علي الملواح عقب انطلاقه
ودنياك تمضي بين ورد ومصادير
قد قيل قبلي ما بها راس طاقه
عبدالله اللويحان
