بانت.. تقاسيم الحزن.. والفرح غاب

ولا عاد.. تاسعني.. حدود المدينه

اكابر بجرحي.. ولي عام.. منصاب

واشيل.. غير الجرح.. أشياء دفينه

اشوف كل الناس.. من حولي أغراب

حتى الشوارع.. تفتقد للسكينه

مالوم دقني كان.. فيه الشعر شاب

ولا لوم عيني.. كان باتت حزينه

مادام صار السيف.. قلبي له جراب

يحق لضلوعي.. تشوف الغبينه

والجادل اللي.. جرحها تو ماطاب

من عقب ماهي.. في الحنايا سجينه

قولو لها.. لاعاد.. تلحقني عتاب

من باعنا.. لا بدنا.. بايعينه

قولو لها ..تنسى.. ولا كننا أحباب

ولا كن ..تربطنا.. علاقه متينه

ماعاد لي حيله.. ولا أملك اسباب

يكفي وفاي.. اللي مضى من سنينه

ياما عليها غرت.. من لمسة الباب

وأغار حتى.. من أبوها.. بيدينه

الجرح ماهو عضة اليد بالناب

الجرح جرح القلب.. لا اقفى حنينه

لا ماهقيت الود.. يمحاه الاعجاب

ولا آذكر نطق فمها.. بكلمه رزينه

هذا جزاء.. منهو جنى غير الأتعاب

ايام ماكانت.. بقلبه أمينه

صحيح ان الشوق.. لازاد غلاب

وصحيح ان الحب.. لعبه ثمينه

رفاع العضياني