لا جفاك الزمان وحاصرتك الهموم

دوّر اللي يشيل الحمل واشتك علاه

واحداً لا نصيته في اللوازم يقوم

قومته تبهج الخاطر وتروي ظماه

ما يشيل الحمول ألا قوي العزوم

والضعيّف ضعيّف ما ربح من نخاه

الرفيق الوفي تلقاه عند اللزوم

مثل بيتٍ إلى احتجته يذرّي ذراه

جاهزٍ للدفاع وجاهزٍ للهجوم

يا الله تكثّر أمثاله وتحيي نباه

ثابتاً مثل ضلع (طويق) بين الرجوم

لو تهب الهبايب ما تحرّك حصاه

وفاهمٍ في العوايد فاهمٍ في السّلوم

طيّب الساس حرٍ ما يبي له وصاه

ذاك والله رفيقي جعل عمره يدوم

يسعد الله صباحه يسعد الله مساه

أتشرّف بمعرفته وأقول محشوم

حشمته عندي أكبر من جبال السراه

اذكره كل ما هبّت علي السموم

هو رصيدي وبنكي في بنوك الغناه

يا عساهم تحت ما طاه كل الرخوم

ويا عسى الله في ها الدنيا يطول بقاه

القصايد بمدحه تحتفل كل يوم

ولو مدحته بشعري كيف ابلحق جزاه

والمراجل صعيبة ما تجي بالعلوم

ما تجي كود بالمجهود طول الحياه

يتعب الرجل ما حقّق كثير الحلوم

والصبر يوصل الرجّال غاية مناه

والليالي تراها لو صفت ما تدوم

مير يا الله توفقنا طريق النجاه

الشاعر/ سهل بندر المقاطي