لا تنخدع ف ابتساماتي تراني حزين

أضحك على شان ما يفرح عدوّي علي

أضحك بدال البكاء واسكت بدال الأنين

وأقول قلبي خلي لو كان ما هو خلي

شانت سنيني وعيّت يا حبيبي تزين

والقلب مليان من هم المفارق ملي

وين أنت ياللي منسّيني عذاب السنين

ياللي مع الناس ما يوجد لزولك حلي

تعال يرحم أبوك القلب كله حنين

صاير كما القدر فوق النار يغلي غلي

تعال مشتاق أشم الفل والياسمين

من جد محتاجلك يا عزوتي يا هلي

محتاج لك حاجتي للماي والأكسجين

كم لي بنفسي عن أيام الهنا مختلي

معقول تزعل على مغليك من كلمتين

ياللي لحالك على عرض الغلا معتلي

سالي مع الناس وأصحابك يسار ويمين

وانا خفوقي على نار العنا يصطلي

ما أملك من حطام هالدنيا سوى دمعتين

طالبك هالحزن علمني متى ينجلي

أسقيتني مر هجرك وين دنياك وين

ما كنك اللي شربت الشهد من منهلي

الشاعر -سليمان الغفيلي - بريدة