ما ودي اسمع يا عرب مات سلطان
قولوا دعاه اللي يحبه ويغليه
دعاه وآل العرش لمعانق جنان
وعد بها المولى لمن آمنوا فيه
رحل عن الدنيا ولاهوا بندمان
وشلون يندم والله اللي مناديه
ورث مكانه طيب واخلاق واحسان
واجيال تدعي له وتذكر حسانيه
مامات من واسى عجايز وشيبان
واطفال تفرح كل ماحل طاريه
مامات من شيد للايتام بنيان
وموسسات الخير من صنع اياديه
رغم المرض يبدي لك حجاج فرحان
يضحك بوجه الناس والسقم باريه
حتى لو انه كان با الحيل مرضان
الشهم ما يقدر يغير مباديه
طبع الكريم بكل الاوقات انسان
تنبيك عن راع المكارم مواريه
في حفظ رب الكون ياوبل الامزان
يامن عليك الجود هلت عباريه
أحمد الجريفاني - حائل
