هذا الرحيل اللي يحزّن وطنّا

وهذا الشعور اللي يكدّر صفانا

يا أهل الوطــن ما جــت على مــا انتمنّا

مات الكريم ولا تحقّق رجانا

ابكوا ترى حنّا هلَ الصدق حنّا

إن ما بكينا شيخنا وش بلانا

خلّوا دموع العين منّا ومنّا

كود الدموع تخفّف اللي دهانا

ســلطان غــاب وغــيّب الضـــحك مــنّا

من راح عنّــا والكــرى مــا هــنــانــا

نشــعر برمــــح ٍ بالمحـــاني طـــعنــّا

ونشعر بلون أسود يغطّي سمانا

بصدورنا هم ٍبيوته تبنّا

وبوجيهنا حزن يترجم غلانا

مات الحكيـــم اللي بعطــفه حضــنّا

مات الحليم اللي بطيبه رعانا

فقده مرير ومن بلاوي زمنّا

وحملٍ ثقيلٍ ما تشيله عضانا

سلطان قبره ما يواريه عنّا

بقلوبنا ساكن وعايش معانا

سوّى سوايا الخيّرين وسكنّا

فضايله شابت عليها لحانا

يا خادم البيتين لا.. لا تعنّا

شــــوفتـــك واقــــف زوّدت من عــنانا

ما يلحقــك في حب ســلطان ظـــنّا

اِرتح ترانا وافرينك ترانا

الله يحفظك يا زبون المجنّا

ولله في سلطان يجبر عزانا

يا رب ساعد وارحم اللي دفنّا

واِلطف بنا يا رب واِقبل دعانا

عبدالله مقعد العتيبي