الله يجبر يابو متعب مصيبتك
كلٍ غشاه الحزن في فقد سلطان
بانت لنا يا خادم البيت دمعتك
وبانت لنا الدمعه على خد سلمان
وقفت بالعكاز تتعبك وقفتك
لأن الفقيدة له معزة وله شان
تعّبت نفسك شلتها فوق طاقتك
وحزنك عميقٍ واضح لكل الأعيان
قلوبٍ يابو خالد بكت لك ونادتك
هلت دموع العين من فوق الأوجان
بانت قلوبٍ راسخة في محبتك
تدعي لك برحمة وتدعي بغفران
يا كثر ما شالت قلوبٍ مودتك
سلطان ما مثله مع العالم إنسان
كم من فقيرٍ شاف خيرك ومدتك
وكم من يتيمٍ جاك شلته بالأحضان
حبك لفعل الخير نبراس سيرتك
سلطان خير للمخاليق هتان
يعطي العطايا ما تبين عطيتك
عدٍ قراحٍ يرتوي منه عطشان
بعطف وحنانٍ بينها ابتسامتك
وعون الضعيف اللي من الوقت حيران
من جاك شاف الخير في وقت شوفتك
مثل المطر يروي سهولٍ ووديان
فقيدنا يا رب محتاج رحمتك
اجعله الفردوس يا رب مسكان
والحمد لله دام نايف خليفتك
نبايعه بالعهد شيبا وشبان
الشاعر - خالد صالح العياده - الرياض
