أكثر من 30 عاماً والشاعر عمير بن زبن يعمل في الشئون الخاصة لصاحب السمو الملكي الأمير سلطان بن عبدالعزيز:
ونصحك وتوجيهاتكم علمتني
دروس تخبر عن عظايم قيادتك
وهنا بعد الرحيل يتذكر الشاعر عمير أطياف سموه الممتدة خيراً في رثائية حملت من الحب والشعر شيئاً كثيراً:
وأنا على قبرك دموعي كستني
بعد السلام أقول ربي يثبّتك
سلطان يامن مدّتك رافعتني
أرجى من الله رحمته ما تعدتك
وان كان أنا ما أرثيك بقعا خذتني
سلطان.. يخسى من تناسا حسنتك
سلطان هلّت دمعتي واجرحتني
يوم المنيّه يا أبيض الوجه وافتك
موتك عليّ مصيبةٍ داهمتني
ياكبرها يوم انها جت منيتك
وانا المنيه لا اقبلت واصلتني
لاشك ودي موتتي قبل موتتك
واليوم وأنا أرثيك بالضبط جتني
أفعال ما أعرف عنك طيلة مسيرتك
وأثنا وقوفي يا الأمير أذهلتني
دمعه يوم إني قد تذكرت دمعتك
على اليتيم وشفتني وانظرتني
عينك، وأمر بما وصلهم بفزعتك
ونصحك وتوجيهاتكم علمتني
دروس تخبر عن عظايم قيادتك
وأشوف وأسمع واكتب اللي لفتني
أوامرك وأقول سمعٍ لكلمتك
وأكتب بصبح وليل ماكلّ متني
من كثر أوامر حسناتك برغبتك
تنفق بلايين إن حسبت اتعبتني
تصرف على المرضى وهذي طبيعتك
واعتاقك الاف الرقاب أنطقتني
أقولها صدقٍ وتكتب بصفحتك
وكلمتك للشايب بشبرا أفرحتني
العاجز اللي قلت له طلبتك جتك
وكم جاك وأنا أسمع يقول انشلتني
يديك يا سلطان طالت سلامتك
يديك من هاك السجون أطلقتني
يامن حفظت الدين والعفو قوتك
ومكارمك مهما كتبت أعجزتني
ما أذكر ولايوم الكرم عنك فاختك
ويومٍ وأنا بالبيت قد هاتفتني
هواتف تفيدني عن شهامتك
من متعب العاصم علومٍ لفتني
عن حادثٍ للطفله اللي بنخوتك
أخذتها تقول تقل إعرفتني
ومسحت دمعتها بيدك ورحابتك
ثم قلت شوفوا طفلة ما أنكرتني
تضحك، وقلنا رحمتك يوم شافتك
قلت أنت هاذي كنها مالكتني
ومن أجلها في الحال هاتفت لابنتك
تقول جتكم طفلةٍ حيرتني
قالت يابوي أمرك ونسمع لقصتك
قلت إن أهلها موتوا واحترتني
أشوفها، قالت رعتها رعايتك
قلت إن قصتها حزن وأحزنتني
فاشروا لها فلة تجي مثل فلّتك
وموتر جديدٍ كنها له نختني
وتعيش معكم مكرمه تحت ادارتك
ويا سيدي بالجود يدك إشملتني
يامن جميع المكرمات أنت هاوتك
وكم قلت للمنعاق لو كلفتني
مالِي لهُم، ياكبر يا الشهم مدتك
والآن وأنا أوادعك ماهنتني
دنياي عقبك ماتساوِ ابتسامتك
ودنياي عن حبك ترى ما اردعتني
يا سيدي ربي رزقني محبتك
ودنياي عن دعاي لك ما أشغلتني
يا الله عساك بجنة الخلد جلستك
والحور بالجنة على كل حتني
لك واقفات مراقباتٍ لطلّتك
يا الله وانا عبرتي خانقتني
أرجوك مغفرتك وعفوك ورحمتك
تشمل بهن شهمٍ يديه نهضتني
سلطان في قبره تمده بنجدتك
يا الله تعلم كم يديه أنقذتني
يا الله يا القادر تظله بجنتك
عمير بن زبن بن عمير
