جانا خبر هزّ القلوب وطعنها
الصبح يوم السبت غطتنا الاحزان
غيمة الم غطّت على نجد منها
تضفي على باقي الجزيره والاوطان
عبر الوسائل والخبر صار منها
وقفت عروق القلب واهتزت ابدان
ولي عهد المملكة راح عنها
عزّاه يا نجد الحزينة بسلطان
اللي تربّع بالقلوب وسكنها
عليه يبس الريق والدمع هتان
اللي بفعل الخير كفّه دهنها
تشهد له الخيرات في كل ميدان
فياض نجد اللي بقلبه حظنها
والله ما تنساه لو طالت ازمان
ياما جروحٍ لليتامى دفنها
واصبح لهم نهرٍ تفرّع بوديان
حنكة فكر كمٍ امورٍ وزنها
يثبت على فعله دلايل وبرهان
جهّز صقورٍ للمعادي ركنها
هزت له قلوبٍ من الخوف باذعان
قايد جيوشٍ للوطن ذاد عنها
وسط البحر والجو والبر شجعان
ليت السنين اتباع ندفع ثمنها
يا سيدي نفديك بقلوب واعيان
مار العمر مثل الذلول ورسنها
يقودها الخلاق علاّم الاكوان
يرحم جسد روحٍ تلف بكفنها
يا الله عسى قبره حدائق وبستان
الشاعر والراوي/ إبراهيم بن محمد الغنام - روضة سدير
