كتب - عبدالعزيز المتعب
الشعر الجزل في مقام سيدي ولي العهد الأمير نايف بن عبدالعزيز أطال الله عمره وأدام عزه هو لسان حال كل مواطن تجاه مقام سموه الكريم؛ لما يكنّه الجميع لولاة الأمر الكرام من ولاء، ووفاء، ومحبة متبادلة، تعكس مدى اللحمة الوطنية المشرفة في الوطن الغالي المملكة العربية السعودية.
دفعني الواجب على كتب الاشعار
وانا زمن مالي على الشعر نيّه
واخذت لي في دو الافكار مشوار
والبال رايق والمسافه مديّه
لو اكثر الشعار قد داج الاقفار
وقنص بها في كل صبح وعشيّه
حاولت اميلها من ايمين وايسار
لعل احصل للشوارد بقيّه
وكل الهجوس تقول لي طب واختار
والفكر راهي والمعاني طريّه
وشفت المدايح بينها حرب واصرار
وتداحمن كلن يبي لوليّه
في مدح نايف تاقف اجلال واكبار
وتصف قدامه سريه سريّه
وتلبس وسام العز ويصير تذكار
ويوعز لها قافي وتعطي تحيّه
للي خدم لامن الوطن سر واجهار
وقضى على الارهاب والعنصريّه
وحمى الرعيّه من مقابيس الاخطار
فالمدن والا في فجوجٍ خليّه
صارم ومقدام وصاطي وجبار
وللعدل شمس وللملاهيف فيّه
اسمه ليا عدى على سمع الاشرار
اجسرهم من الخوف ينسى خويّه
وان شاف له صوره بتقرير الاخبار
كنك مثوّر فيه بالبندقيّه
واسمه ليا عدى على سمع الاخيار
تسابقوا بالقول يا حي حيّه
ياحي سيف بالمواقيف بتّار
يحكم بشرع الله وسنة نبيّه
ويمشي على منهج طويلين الاعمار
اشبال من يارد حياض المنيّه
عودٍ جمع شمل العرب واخمد النار
نار الحروب بسالف الجاهليّه
والحر له ماكر وخلف له احرار
شقر تنومس كلها صيرميّه
ياعل سالفهم مع الصحب الابرار
وياعل باقيهم حياةٍ هنيّه
الشاعر - خليل بن هدلان
