إن كان نفسك على التوديع ميّاله

كلٍ حسب رغبته يصيغ مشروبه

عذرك تجاوز مجاله وأتعب رحاله

وبانت مواريه وأعلن كامن سلوبه

تنفّس الليل عطره واكتسى شاله

وتنحّر الفجر ميعاده ومكتوبه

واليوم يومٍ كلٍ راح في حاله

وكلٍ حسب خطوته واستعذب دروبه

ساعدني أنسى هديل الصوت وآماله

واودّع آخر بقايا الحلم وذنوبه

ودّعني بصمت وارحل كلٍ وفاله

ابعد وكل الدروب السمر محسوبه

وأبشّرك.. ماورى المقفي بكى الداله

ولا ضاق صدرٍِ على قدره لبس ثوبه

والمبعد اللّي يساومني على وصاله

يفرش بساط السّعه ويليّن جنوبه

ما هوب أنا اللّي يساومني بمكياله

ولا عاش راسٍ على الذلّه بنا طوبه

الشاعر - نايف المطيري