أنا وقصيدي.. اتفقنا.. على شيء

إن القصيده ما تجي غير فكره

ماكل حيٍ ذكره يصير له حي

ولا كل ميتٍ لا اندفن مات ذكره

وموقف يجي أحيان تكره به الخي

وموقف يمر تعز من كنت تكره

خض أصدقاك.. التجربه.. صايره لي

يبان النقي.. وتبيّن وجيه عكره

الناس تفرق نتفق كلنا بذي

حال المعرّف ماهو بحال نكره

ناسٍ فرج.. بعد الكريم.. ولك الفي

لا صكّتك بقعا.. وهيجنت مكره

وناس تهقابه.. بس تطلع ولا شي

ما تسقي الظامي ومشلول فكره

بعض الشوارب لو تبي نفعتك.. عي

ثعالبٍ.. ما عيّشه غير مكره

الأرض لا جفّت قل فبطنها المي

يعطيك ربي كل ما زدت شكره

ودام الكرم خلّد عطايا ولد طي

بسوق ذودي ما أبي منه بَكره

يعيش طيبك.. لا لقى واحدٍ حي

ويموت طيبك.. لا تجازى بنكره

وارضى بمقسومك ولو تنكوي كي

مقدّر.. وما تدري شفيه بُكره

ومهما تزخّرف دنيتك كلها غي

نهايتك لو طوّل الوقت سكره

وطيرٍ كفخ للصيد مع فجَّة الضي

وطيرٍ يهد وهدّته حول وكره

كان الورق بستان يمناي له ري

وصدري غدا له بير.. والرأس مكره

ثم ينبت البستان وتقطّف يدّي

وردٍ لقا في فايحٍ ريح ذكره

لي نهج وحدي ما أتشبه فقط زي

الشمري نواف الأشرم بحكره

يعني قصيدي.. حالف إنه ماهو أي

حكيٍ يمر ولا تجي فيه فكره

الشاعر/ نواف الأشرم الشمري