يا اهل الصدور اللي سواة الصناديق
على الملفات الجدد والعتيقه
اللي على حفظ العهد والمواثيق
باقين لين الله يبيد الخليقه
يالانقيا يا اهل الوجيه المطاليق
من فضلكم بس اسمعوني دقيقه
أنا بصدري حاجةٍ تشبه الضيق
أشيلها لكنّ ماهيب ضيقه
دعوى جديدة لصّقت فيّ تلصيق
روج لها رجلٍ ماقال الحقيقه
قلت اتجاهلها سواة الخثاريق
اللي من اولاها اهتمامه تعيقه
لقيتها تغيب لحظات وتفيق
معي وانا بعض المجامل ما اطيقه
مدام في صدري رماة وتفافيق
والروس مرفوعة والالسن طليقه
ابا انشد اهل الشان ما هوب تحقيق
لو أجرح اصحاب القلوب الرقيقه
من حقي أفهم وش تقول المخاليق
عني وانا عنهم سموعي غليقه
أقفي عن اهل الحكي والخيق والبيق
واتعب لمعرفة الرجال العريقه
أبغض ما اشوف الوسوسة والمدانيق
والتمتمة بين الشقيق وشقيقه
والحسحسة وسويلفات المطافيق
وزرع الفتن بين الصديق وصديقه
هذاه انا والهيلمة والتلافيق
ترجع على من باعني يارفيقه
من ضاق من كيفه كذا خله يضيق
مدة ويلقى من يدله طريقه
إن اقتنع مكانته فالمعاليق
وان مااقتنع ماقلت له في حريقه
النار لو تشب تحت الاباريق
تلحق على الدلة وورد الحديقه
حبيت أسجل لي تحفظ وتعليق
على العلوم الشايكة والدقيقه
والا الثقة مالاحقتها ملاحيق
لو يلحق التشويه وجه الحقيقه
فراج الكرشمي
