مشكلتك إنك تجهل بقلب مغليك
وتجهل بلحظات الغلا وش تسوي
ياشين ليل البارحه يوم احاتيك
حزين وانا الحزن ماهو بجوي
لكن عزايه لا جفتني خطاويك
بهرّت انا شعري وشبيت ضوي
في سيرتك غرقان لين اذّن الديك
وانا أحسب اني بأول الليل توي
تركتني وابعدت عنّي حراويك
وخليتني مابين ضعفي وقوي
من غبت وافواه الأماكن تناديك
والنوم صار بغيبتك هو عدوي
تبخل بمداتك على كثر ماعطيك
وانا آتساقط لك رطب من علوّي
نقشت لك حنا حروفي بأياديك
وياكثر ما استمطرت لرضاك نوي
الله يسامحني ويغفر تماديك
يوم تعزف لحن الغياب المدوي
للوصل باب وللمفارق شبابيك
وليت الجفا ياتي برفق وتروي
- عطاالله ممدوح
