يقول الشاعر عبد الله السلوم موجها هذه القصيدة للشاعر محمد الوهيبي:
ياعيني اللي تهل دموعها من كثر الاحزان
تبكي على صاحب مالي على شوفه وسيلة
تبكي فراق الوليف اللي مقره قاصي الاوطان
قلبي يحبه ورجلي من عناها ماتجيله
يسكن بعيد وناب (عتيّقة) حليت سكان
في سوط جو من التعذيب مايوجد مثيله
معلوم ودي بشوفه مار اشوف الوقت خوان
لو زان لي ساعة فالشين ساعاته طويلة
وان جيت ابرسل مراسيلي ذكرت فلان وفلان
ناس بضدوننا بالقيل وكبود غليلة
احرص على سمعة الغالي وانا للستر شفقان
ماودي الناس تشمت به ولاتعرف سبيله
خلٍ وفا(لي) بميعاده وجازاني بالاحسان
والله فلا انسى مواصيله والأيام الجميلة
اللي بنى في ضميري منزل ماحلّه انسان
حبه يدلّه وغيره ضيّع المولى دليله
الناس زادوا ملامي مارانا سديت الاذان
ماودي اسمع من العَذّال منطوقه وقِيله
ان قلت ابصبر فانا قلبي يا أبوعزيز مليان
مالِيه حبي لسيِد البيض منسوع الجديلة
وان قلت ابترك دروسي وانحره ويلاي غلطان
وش قيمة الشخص لاضيع بها الدنيا حصيله
والليل كل ينام وصاحبك يقضيه سهران
مافيه غير المسجل هو نديمه طول ليله
واوراق شعرٍ يقلبها حوَت من بدع الافنان
مايجعل المستمع يذكر زمن (محسن) وجيله
ماعاد لي راس مال الا ورق شعرٍ وشرطان
الفكر ضايع وسجاتي مع العالم قليله
عبد الله السلوم
وهذا رد الشاعر محمد الوهيبي:
أهلاً هلا بالكتاب اللي لفى من طير حوران
من شاعر يحكم الموضوع ويشب الفتيلة
من شاعر مايجي قيله غفل من غير عنوان
ألا يوضح به المطلوب مايحرج قبيله
ساعه لفتني بيوته صرت اطالعهن بالاعيان
والقلب يصغي ومضمون المعاني يستوي له
قيل يصور حياة انسان مفتون وولهان
يخفي الهوى عمد لايعرف طريق ينتوى له
يشكي علىّ الفراق ويذكر ان الوقت خوان
وان الليالي ولو هن مقبلات لهن ميلة
ويقول عينه تهل الدمع فوق الخد هتان
ولايكتحل بالمنام ولاتطبق طول ليله
سبة وفيَ وفاله ماتبدل به ولا خان
وهو على المثل وافي مار ماللوصل حيلة
يخشى على سمعة الاثنين من كاين وماكان
ويحب يقطع على الواشي طريق ينتحي له
وانا برايك يابن سلوم مسرور وطربان
واقول لاهنت خل الضد مايبرد غليله
خله بغيضه واحط ممشاك وافعالك بكتمان
يخيب ظنه وحمل الهم يعجز لايشيله
والى قفلته دروبه واندحر فالذيب سرحان
له هدة خاطفة في الصفرتين وفي المقيلة
ماحدٍ يشوفه يجي جايع وثم يرد شبعان
وانتَ على درب ابا السمح امش لاتتبع بديله
الى سنح فرصة والناس عنكم عمي الاعيان
فاورد على من توده ورد قبل يلوح زيلة
تقضي لزومك بنفسك لاتطرش كاين كان
خل المراسيل ماواد يسيل بغير سيله
هذا هو الحل ماهوب السهر مابين شرطان
واوراق شعر تقبلها ولامنها صميله
الا العنا هو ثمرها ثبت مايحتاج برهان
ودروسك اللي قعدت لها بجدتها صقيلة
منتب تذاكربها بالك عن التعليم مشتان
والقول قولك ولاغير المسجل تلتجي له
لو تاصل الحبل سار القلب هو والعقل سيان
واصغيت للعلم وادركته منالٍ ترجي له
وارتاح خاطرك عقب الهم والتعبان تعبان
يضيع رايه ويحسب كل اموره مستحيلة
لياك تفلس من الاثنين لك سبق وجنحان
وراي يدلك وقضب اليد ولاشي تخيله
محمد الوهيبي
