يا عذابي وش بلا قلبك كتوم؟؟
الصراحه طيبة يا مبتغاي
يا حلاة البوح في وقت اللزوم
وانتي اللي ساكنه داخل حشاي
التغطرس بالغلا ماله لزوم
يا ربيع القلب مدري يا شقاي
الغلا ينبض بقلبي كل يوم
لا تثير الجرح وتزود عناي
فلها والليل جلاي الهموم
لا صفا جوك وجوي يا غلاي
المحبه بالتغلي ما تدوم
والوصل يا زين هو غاية رضاي
يا عيون اللي على العليا يروم
فرخ توه من بلاد الفرس جاي
يا قمر وضاح من بين النجوم
يا سبايب علتي وانتي دواي
جونا يا زين غطته الغيوم
من وصالك يالغلا يصفي سماي
لو نزود لو ننقص بالعلوم
انت عارف مستواك ومستواي
عنفوان الشوق في قلب محروم
والوله والبعد هو سبة غثاي
في وهج صيفك تحملت السموم
لا تسبب يا حياتي في بلاي
الشاعر/صقر المرشدي
