لا عدت يا علمٍ منه فار دمي

هز الخفوق وساير الجسم مشدود

علمٍ حزين وبالمصيبة ملمي

اسوأ خبر جابه من الناس ملهود

قعدت اجاهد عبرتي واستهمي

واقول ما هو بأول الناس مفقود

مات الرسول المصطفى ذاك الأمي

وكلٍ يموت وخالق الخلق موجود

وش عاد لو غرّقت بالدمع كمي

ماني مرجع سيد الطيب والجود

ليت المنايا شاورت بابن عمي

تختار ما تبغاه وادفع لها زود

ادفع لها خبلٍ ذميمٍ مرمي

لو مات ما يبكى ولا عنه منشود

من ناس باعراض الخلايق تذمي

اهل الوجيه السود وقلوبهم سود

مار القدر لا حان للنفس خمي

لو يلبس الانسان من صنع داود

عز الله انه مات رجلٍ مهمي

زحزيح من ضمن الزحازيح معدود

كم قالةٍ صعبة عليها يتمي

لاهابها اللي يجهل النقص والزود

اسمة رباح ورابحٍ يوم سمي

شيخ على شيل الثقيلات محمود

الله يجيره من بلا كل غمي

عند الحساب ويوم شاهد ومشهود

وصلاة ربي عد نصبٍ وضمي

على النبي عداد ما يخضر العود

الشاعر/ خلف بن غالب بن مريخان الحربي