الوقت عيّا لا يجيلي على الكيف
عيّا يجي وقتي على كيف ودي
من ضيقتي عديت روس المشاريف
لعل ضيقة خاطري تجرهدي
وحولت منها ضايق الصدر ومعيف
بيني وبين الوقت هوش وتحدي
وقتٍ سعى بفراق زين التواصيف
عقب الغلا والحب عني يصدي
سبّة هل النّمه وناسٍ ملاقيف
أحدٍ يجيب العلم واحدٍ يودي
جاني يودعني دموعه مراديف
وانا دموعي سايله فوق خدي
يقول حبك محرقٍ بالسراجيف
واقول له من حبكم باح سدي
وكلٍ على الآخر كثير التحاسيف
عش لحظة الفرقا ترى الوضع جدي
حبٍ تعرّض له ظروف وصواديف
والحظ عاثر والزمان امتردي
والجو هبّت به رياح وعواصيف
جوٍ به المبصر يبيله مقدي
حل الفراق وضاع شمل المواليف
لا في يده حيله وانا وش بيدي
الشاعر/ عبيد بن فالح أبو جراح أبوثنين
