هذا الوطن ماهو مثل كل الاوطان

يكفيه بالأمجاد (صقر الجزيره)

عبدالعزيز أسس له المجد عنوان

حاكم ابن حاكم نظيف السريره

مهما يدور الوقت وتمر الأزمان

مثل (أخو نوره) ما يجي شخص غيره

ما تحصي افعاله قصايد وديوان

له سيرة ما هي مثل أي سيره

(ابن فيصل) ليا انتهض طير حوران

من مثل (ابوتركي) يصد المغيره

(ابن فيصل) ليا غشا الجو دخان

العز يتبع له ويتبع مسيره

حر شهر باقصى المعالي بليهان

قضى على كل الفتن الشريره

بالحق يردع كل من كان غلطان

والمعتدي يردع ويعرف مصيره

في حكمته جعل القبايل كما اخوان

من عقب ما هي بشرّها مستطيره

وحنا لهم واللي مضى خير برهان

فينا الوفاء مزروع ما نستعيره

من غربي الشعبه اليا شرق نجران

عقب التفرق صارت الكل ديره

خيره شمل كل المناطق بالاحسان

في داخله دايم على الدين غيره

وارسى قواعد كل حكمة بميزان

وحكم بشرع الله ولحد (ن) يديره

وارسى قواعدها على خمسة اركان

مشى بدين الله وريح ضميره

ومن موتته (ستين عام) إلى الآن

واليوم كلن صار ينعم بخيره

المملكة ترفع لك الشكر عرفان

أسستها بالدين وقو البصيره

يا الله عساك بجنة الخلد سكان

وبجنة الفردوس عينك قريره

خالد بن سعد بن جارد الجارد