رثاء في معضد بن ضيتان بن عامر العريض الدلبحي رحمه الله واسكنه فسيح جناته:
ياحروف الشعر يابيات القصيده
حضري لي واحضري وقت اللزومي
اقطفي جزل المعاني والمفيده
وعن هزيل القاف والابيات شومي
ياعظيم الشان يامحصي عبيده
يا إله الحق يالرب الرحومي
مرسل خير الرسل بافضل عقيدة
مرسله بالحق للعالم عمومي
طالبك وانته عليم اللي نريده
تغفر لمعضد عسى قبره نعومي
ياعساه بخير من جودك تزيده
من وسيع الفضل ماهوب محرومي
جعل قبره روض وحدوده مديده
من لهيب النار نجه والسمومي
يا عسى بالكف الايمن شالت ايده
يوم كل الناس فالمحشر لمومي
الفقيده يوم اقول انه فقيده
معضد اللي ما مشى درب الرخومي
الوفاء والطيب ماشي في وريده
نظرته فوق الثريا والنجومي
راعي الكف النديه والجويده
الكريم اللي عن الهزله يشومي
مايهمه وش بقى داخل رصيده
يوم بعض الناس يحسب فالرقومي
ما تعود كفه المده زهيده
يوم اوصف بالكرم مثل الغيومي
معضد اللي من تنصاله عضيده
حر نسل احرار للعليا يرومي
حزة الميقاف وليال (ن) شديده
من نصاله مايعود بالهمومي
ماتواني مثل ضلع النير حيده
لا حتمى المافق على المافق عزومي
وفي ختام الفاق وابيات القصيده
جعل قبره روض وانعامه تدومي
عبد الرحمن عايض المقاطي
