والله إني قدها قول وفعايل

والقصايد ما لها إلا بنت أبوها

والله إني ما كتبت إلا الأصايل

ينتثر منها السفرجل لا قروها

ما اقبل التصنيف في غير الأوايل

والنوايا البيض تهدى من نووها

والله إني بنت وافين الخصايل

يوم قدح زنادهم ربعي خذوها

وشيخنا له فزعةٍ بين القبايل

شافوا أفعاله وفزّوا واقتفوها

ما عسفت القاف كسبٍ للجمايل

القصايد هالأحاسيس كتبوها

القصيد اللي كتبت أشعل فتايل

وبنت ابوها لو نووها ما ثنوها

والقصايد يومها سوّت عمايل

جيت ابشعلكم بها وإلا احرقوها

ومركزي معروف ما أبي له بدايل

والقصايد ما لها إلا.. بنت أبوها

بنت أبوها