يا صاحبي عن دعوتك والمشاريه

اقرا تفاصيل الجمل قبل الاعراب

ماني جرير ولا انت نادر قوافيه

شتان لا قلنا مواقيف واصحاب

اللي ضمى صكات الأيام ترويه

واللي روى ماله مشاريه وعتاب

يعني بلا يا مدور الصدق تشويه

ارسم لي الصوره ترى الصوت جذاب

بعض القلوب اللي حسدها تواريه

اليوم ثلج الحسد يا صاحبي ذاب

معاد باقي بالعرب من نداريه

ولاني مجامل كل مغرض وكذاب

حتى القريب اللي عرفنا خوافيه

ماله بصدري يابن الاجواد ترحاب

اللي ظنونه للرخيصه توديه

عكس الرجال اللي يفكون الارقاب

وقتٍ يعاندنا ويخلف مباديه

يتعب وأنا بتعب بتفنيد الأسباب

عالم يحيّر ناشده من بلاويه

تعبت أدوّر للوفاء بنك وحساب

طال الطريق وقلت يا عاذلي ليه

تسدل علي من ضيق الأيام جلباب

وتنشد وأنا قلبي بصدري مربّيه

على الوفا لو كان ضايق ومرتاب

ياما عطيته قبل الأيام تعطيه

درسٍ يكرّس غيبت الحر لا غاب

والشعر ما يصلح اليا صار قاريه

رجعي ولا يفتح للأفكار الابواب

اللي يصيب الصدق مره ويخطيه

يسري ظلام الليل تايه وحطاب

حظه على هم الليالي موديه

مسرف وعن درب المتاهات ما تاب

هذي حياته لا تقولون يمديه

لا خاب حظ الطيب راعيه ما خاب

الشاعر/ سعيّد العمودي