مل قلب ظروف الوقت حامسته

راح العمر والحياة ابطى يرتبها

ما مر يومين من عمره معومسته

إلا خذا لحالته اوسع تجاربها

ماهي تجارب من كتابه ومدرسته

من لب صخ الحياه ومن مقالبها

يا كثر قبلي من العالم تفرسته

دنيا عسى الله يكفينا عواقبها

ما للشقي في الحياه إلا معاكسته

ولا المحظظ يعدد في مناقبها

مانيب احب الردي واكره مخامسته

والعالم الفاشله ابعد وجنبها

ولا السنافي ما بدل في مجالسته

لو بدلت باقي العالم شواربها

ما هيب تكفيه لا صفحه ولا لسته

لو عددوا حاضر علومه وغايبها

يتعب أبو الطيب ما ياصل منافسته

لو يجتمع صالح الامة وتايبها

اللي افعوله مع ربعه منومسته

ما يجهله اصغر اربوعه وشايبها

من مد يمناه ما عود ولا ترسته

يمنا السنافي عطاياها مكاسبها