تعال اغني لك الموال وغيابك

للشوق (بحة) تميز نبرة اشعاري

زهبت عذري وردي لابتدى عتابك

كم لي افكر شقول ان قلت شالطاري

بقول مشتاق للطعنة من اهدابك

ومشتاق اكثر لقولة (باخذ بثاري)

وبقول مليت ماادري ملني بابك

من غبت دونه وقف عمري ومشواري

ماغير اسولف له اللي صار باسبابك

وارمي عليه الشقا والهم واعذاري

من غير لا ادري اجي وان قال وش جابك؟

قمت اتساقط علي من (غيمة افكاري)

لين اتبلل ((وله)) واطيّر اسرابك

وتروى عصافير فرقانا من انهاري

واردّ - ميت عطش- واقلب كتابك

واقرى حكاية سرابٍ عذب ازهاري

شفني ذبلت وطفيت وجيت ابحيابك

عمري دفعته ثمن دربي ومسياري

اما تخليني احيا فيك وابقابك

ولا تاكد وفاتي آخر اخباري

ابك انت مرة طرالي احرق اعصابك

طاوعت فكري عليك وجيت لك ساري

فكرت ابيعك وابعثر بالمدى اطيابك

عقلي نواها وقلبي قال انا (شاري)

ورديت احسك بصدري واحسب احسابك

اني زرعتك لقا وابقطف اثماري

واليوم دام المسا توه تغنى بك

اقرب مادامك لحن تشتاقه اوتاري

ابعزفك للقصيد اللي تسمى بك

واشب لك داخل بحور الشعر ناري

واسمّعك ما كتبته لين ينتابك

غرور واسمع كلامٍ عده اجباري

لاصرت انا والقلم والدفتر احبابك

يحق لك لو تقول ان الشعر داري

ما قلتها قصدي اني اكسب اعجابك

لكني بهذي ادري ويش مقداري

الصعب جذاب وانت الصعب يزهى بك

وانا على الكايدة يا عاشقي ضاري

وان جات للجد له لذة ترى غيابك

شف (بحة الشوق) كيف تميز اشعاري