ابو متعب خادم البيت وذراه

عظّم الله اجرنا واحسن عزاه

ما نقول الاّ مايرضي ربّنا

ل لله اللي ماعطاه وماخذاه

ولّا نايف جمرته ما تنطفي

الف لوعه والف حسره والف آه

آه يانايف يا طول نواحنا

ما بقى بالقلب عرقٍ ما بكاه

آه يانايف يا كبر مصابنا

موتته ماهي بحيّالله وفاه

موتته دمعة مليك ونوح شعب

وحزن له أوّل ولا نعرف مداه

يانهار السّبت لا جاب العلوم

ويش من سويسرا جايب معاه

خبر عاجل مات نايف عزّنا

وماحد مصدّق وش اللي هو قراه

لين ديوان الملك ذاع.. الملك

بمزيد من الأسى ينعي أخاه

بالحرم صلّوا عليه وشيّعوه

في جنان الخلد نايف ياعساه

شايله سلمان ودموعه تقول

ليتها بارواحنا تشرى الحياه

والله ان نفدي بها رمز الأمان

كل شي بعمرنا الغالي فداه

لانّه اللي أفنى عمره للوطن

من عظيم اخلاصه وزايد وفاه

ميزة اعيال الملك عبدالعزيز

سيرته كم رمز كمّلها وراه

وان رحل نايف بسلمان البقا

بنفس منهاجه مشى وعلى خطاه

هذا سلمان المكارم والفخر

مقدم وعز وذخر لنا وجاه

نصرة المضيوم باليوم العبوس

ونخوة اللي حزّة الضيقه نخاه

لا ضرب يضرب بكفٍّ من حديد

كف عدلٍ ترهب قلوب العداه

يا ولي العهد جينا نبايعك

بيعة اللي مايخونون الوصاه

الشاعر / الحميدي الشمري