ديرةٍ تستاهل التدليل
سعودي وافتخر في ديرتي واحبها بالحيل
لها بين الضلوع وداخليّ القلب منزالي
سعودي وافتخر فيها واقبل أرضها تقبيل
الأرض اللي بها البيت الحرام أرضي ومدهالي
أدللها دلال وديرةٍ تستاهل التدليل
ملايين البشر ما هوب أنا اللي دلل لحالي
غلاها في القلوب وحبها من جيل يارث جيل
غلاها في قلوب الناس من حرمة ورجالي
عسى الله يرحم الشهم الإمام الفارس الحلحيل
موحد مملكتنا الغالية والحق ينقالي
جلا عنها الجهالة مثل ما يجلي النهار الليل
عقب كانت قبايل بينها غارات وقتالي
أخذ سيفه وقال الله واكبر ثم قاد الخيل
يخوض المعركة ما خاف غير من الله الوالي
يقول الله وأكبر واتبع التسبيح بالتهليل
حكم بالشرع والدين الحنيف بكل الأحوالي
وعقّب له ملوكٍ ما رضت بالذل والتضليل
على نهج السلف نهج الخلف أقوال وأفعالي
ملوك تحكم بشرع الإله ولا تحب الميل
مواقفها عظيمة من قديم ووقتنا الحالي
سعودي وافتخر فيها واقبل أرضها تقبيل
ولا أرضى غير بالثوب الأصيل شماغ وعقالي
جهاد العقيلي
