Thursday 10/10/2013 Issue 14987 الخميس 05 ذو الحجة 1434 العدد
قلعة الوادرين
علّموا اللي كل يومٍ يقابلنا بثوب
ما يخدّرنا كلامه مَعَ من خدّره
إن لقينا اللعب نزحف مع جوٍّ لعوب
وإن هبطنا سوق طيِّب خذينا ندّره
العرب ماهيب تعلم مسدَّات الغيوب
ووارد الما ما يدلّه يكود مصدّره
ولا تجيك الحصبه الا من فراش محصوب
وحبة الجدري تجي من فراش مجدّره
والمحب اذنيه ماهيب تسمع للعيوب
والعدو لادرهمت به تجي متحدّره
دامت الأخلاق يملك بها الواحد شعوب
ياجب إنّها في جميع الأمور مبدّره
وإن لقيناها طويله وموخرها سحوب
والمرض فيها فحوله تهيّج فدّره
إن قدرنا نقفل الباب من دون الهبوب
والا جا دربٍ لنا والقني مسدره
الأصايل كل يومٍ تلافح بالكعوب
والردي لاعيَّن اللي يهينه قدّره
ولا تعرف حسابك الا ليا صرت محسوب
وشرهة القادر على العالم المتقدّره
في المقابل تنفتح له دواليب القلوب
والمقفِّي قلعة الوادرين تودّره
- الشاعر/ سعد بن جدلان
