وطن,, لاعدمك الحب والخير يا اصل الخير
تهب الفضايل وبسوافي الشوق تمطرنا
وطن,, يا كتاب من الفخر والمجد والتطوير
على كل اجودي يا كتاب عطرنا
عزيزٍ يا وطن,, صدرك رحيب وواسع وكبير
جميل يا وطن وترابك اعظم من دفاترنا
وش اللي يكتبه شاعر ولو هو رائع التصوير
عن اعوام تسافر بالزمان وما تسفرنا
وطنا يستحي منك القصيد ولا يتمنى غير
تبخّر ذكرياته من سوالفك وتبخرنا
ولك بين البلاد اوتاد عز مسطره تسطير
قراها ندنا قبل يتهجاها معاشرنا
على يدك نبت هذا الشموخ وغردت هالطير
وباحضانك كبر دين الرسول وعز مصدرنا
لك المجد التليد بهيبة التهليل والتكبير
ولك الوقت انحنى دام انت بالايمان تشعرنا
مدام انت المأذن والمنابر ما يمسك ضير
ومدام الله حماك الامن يغفي في محاجرنا
ولا دنس عفافك حاقد متعالي التقدير
فلا شيء يضرك وانت باولنا وباخرنا
نعرف انك كبير ولو رموا لافاقك التصغير
ونعذر اعداك لو هاجوا وغاروا من تطورنا
وحنا عزنا بالدين قبل الزيت يسكن بير
حنا مجدنا لله قبل المجد لصورنا
ترانا فازعين لكل محتاج بلا تقصير
وترانا والمين لكل ملعون ينافرنا
خذته احلامه لطيشه ووهمه مادرى شيصير
زبن سود النوايا يحسب ان غدره يدمرنا
ولا قال بسطا,, حمام سلم وما تعرف تطير
نقول ان جدت علوم الشوارب,, انت خابرنا
تسودنا بياض ال السعود برغبة التغيير
شيوخ سادوا الدنيا جلال وهم عنابرنا
هل التوحيد والراي السديد وبذرة التعمير
رجال الطايله والنايله وعيال عامرنا
أسود من نسل عبدالعزيز اللي علومه غير
فلا يولد رجل مثله وهو عصبة مفاخرنا
عظيم بمبداه,, سيد بجوده,, فارس وصبير
عطوف بقسوته,, جبار بعفوه وساترنا
ونسله ما غدوا عنه ولا هبوا هبوب البير
تجلوا في سما حسن الوصوف وما تأخرنا
تركنا للدول هم السقاء وعادة التكرير
وصلنا في مساعينا السحاب وما تعثرنا
هناك المدرسة واجيال علم وبكرة التكوير
ونشيده (سارعي للمجد والعلياء) تسهرنا
وهناك المزرعة تغري الصحاري بفكرة التشجير
وهنا حلم الصناعة زاد قوتنا وفجرنا
هنا الاعمال والعمران والتوريد والتصدير
هنا كل الدوافع والطموح تشيل حاضرنا
وطن وياه ما يفنى كلام ولا يقل كثير
وطن له قصة بين الضلوع تعجز اشعرنا
وطن قبر الرسول وقلبه الاسلام والتجيير
وطن مكة ويثرب والوحي,, من به يكابرنا
من بيوت الشعر والطين والسني وعلوم الزير
لناحطة السحاب وها لمعالم في مآثرنا
من الضعف وطلاسيم الجهل,, للعلم والتنوير
من فلول الشتات لوحدة بالعزم تغمرنا
وانا مهما تعزبت القصيد وهمت بالتصوير
تعجزني قممك اللي ليا هبت تذرنا
ولكن ما يعذربني ولو هو خانني التعبير
قصيدة,, تعبر عن كثير يسكن اكثرنا
وطنا يا وطنا,, كل مية عام وانت بخير
وعقبال الف عام وانت تبقى في دفاترنا
