الله واكبر ياتصاريف الازمان
ساقتني الدنيا على كل ميله
مكتوب اعيش الحب واموت كتمان
ولا لي على صرف المقادير حيله
كنت احسب ان الحب روضٍ وبستان
اجني زهور الحب من احلى خميله
وغزيت قلبي في هوى الغيد نيشان
وصابه من الخفرات ضافي الجديله
وزلت بي رجلي يوم وقت الهوى حان
ومشيت بدرب الحب سنينٍ طويلة
اسمه هوى ويضيع في كف ميزان
وعند الحقايق يهلك النفس شيله
وهذا الهوى لاحان راع الهوى هان
مكسور خاطر والنواظر ذليله
واخفيت سري عن غثا فلان وفلان
وبعض البشر بالسر ماينحكيله
وشكيت له من لوعة الوجد ولهان
وشفت الغدر من اللي كنت اشتكيله
شفت الغدر بالعين يوم الزمن شان
وضاعت اسنين الحب في ظرف ليله
وطويتها بالقلب على مثل نيران
ياكثرها بالحيل لو هي قليله
وبجدار الحب كتبت غلطان غلطان
وكان الندم ينفع بتبع سبيله
