يا سحاب جا من القبله وريد

صدّر لديرة حبيبي واقنعه

قل له يجيني ترى حالي زهيد

خله يجيني وياخذني معه

سافر الغالي وخلاني وحيد

عايش بين الرجا والمقطعه

لابكا ينفع ولا صبر يفيد

وضاقت الدنيا على كبر السعه

قالوا الأصحاب وش بك وش تريد

نسمع اصوات ونسمع جعجعه

قلت أنا حنيت للظبي الفريد

مثل ذودٍ حن يبغى مربعه

حبها يمشي معا دم الوريد

وين سار الدم خلفه يتبعه

حبها في داخلي ماله نديد

نبت في قلبي بجذعه وافرعه

ثم قفلت القلب بابواب الحديد

خايف الحساد تعرف موقعه

في بنوك الزين له أعلى رصيد

كل زين الخلق خلي منبعه

من بياضه ينبعث نور شديد

مثل نور الصبح شعشع شعشعه

القمر من نور خلي مستفيد

ياخذه ثم يعكسه ثم يرجعه

ومن جمال الزين لو لوّح باليد

للقمر حول وضمه باذرعه

ثم نظم في خلي الغالي قصيد

كل خلق الله تشوف وتسمعه

وعيّنه للزين في العالم فريد

وتوجه تاج الجمال وودعه

ومن جماله يذهب العقل الرشيد

خشف ريمٍ هاني في مرتعه

والله ان لقياه عندي يوم عيد

يوم ينسيني ليالي مفجعه

باتعافا لا نظرته من جديد

لو لمس دقات قلبي باصبعه

ف,, ياهل ليلى العامريه من بعيد

ارسلوها كان فيكم مفزعه

الحقوا قيسٍ جديد اسمه عبيد

قبل ياتيكم خبر عن مصرعه