بديت بإسم رب الكون عدد خطوات ألف الميل
ودعيته بيحفظ الدولة عدد مده وتقريبه
قرينا سيرة الضرغام أبو تركي سقاها السيل
وذكرنا يوم وحدها وقبايلها تهلي به
جمع أركانها بالدين وجلل شأنها تجليل
وقطع دابر طباع الجهل وحماها من رواسبه
فتباشرنا بيوم المجد ونورنا ظلام الليل
وتفاخرنا بموطن فيه حجر مكة وثرى طيبه
ملكنا خادم البيتين يجمّل حالنا تجميل
حياته كلها امجاد من الاجواد ياطيبه
حفظ تعليم دولتنا ولا يرضى له التأجيل
ورفع شأن الوطن عالي حماه الله من غيبه
أبو فيصل صليب الرأس يانعم الاصل والتأصيل
خدم داره وزواره وجميع الخلق تدري به
وعبدالله ولي العهد ابو متعب صمته ويل
يدمر من طغى تدمير وينصر من فقد صيبه
فتح قلبه قبل داره وشال الحمل والتحميل
ونشر جو السعد للي طلب نقله وتطبيبه
رأس صرح الحرس والخيل وفعّل فعلهم تفعيل
وشارك شعبه افراحه يا نعم الشيخ والهيبه
وسلطان النائب الثاني أبو خالد حبيب الجيل
أمير يقطع الحرمان والمحتاج يدري به
وزير دفاعنا المحبوب قفل حصننا تقفيل
بقوة جيشنا الاربع نزيد الخصم تعذيبه
أمير واسمه الانسان لاجل شعبه سهير الليل
كريم بالعطاء والجاه له المليون ترحيبه
فهد وعبدالله وسلطان معاديهم نزيله زيل
ولاة الامر فجر وفخر ذكرهم دوم نسري به
وجميع اخوانهم ساده مخاصمهم ياويله ويل
حماهم ربنا المولى عدد جهره وعدد غيبه
وحنا شعب هذي الارض تعاهدنا نشد الحيل
ونرفع شأن دولتنا لاجل توصل مكاسيبه
رفعنا راية التوحيد وعدلنا حروف الميل
وتجاوزناعصور الجهل وأشياء كانت مريبه
حكمنا في جزيرتنا بوحي انزله جبريل
وتبعنا سنة المختار ومنهاجا لنا هيبه
جعلنا امرنا شورى بحكم زادنا تفضيل
حكم نابع من القرآن ونور الهدي تهذيبه
دعينا امة الاسلام لحكم الله بالتفصيل
وجمعنا شملهم بالحق والاخلاص والطيبه
فتحنا في قلوب اوطان مراكز دين له تبجيل
لاجل ننشر معاني الدين مثل ما جات بلا ريبه
طبعنا مصحف المولى وحفظناه بالترتيل
عرب اعجم بلغات الارض كتبنا لشبه وشيبه
كسينا كعبة الرحمن وغسلنا جوفها تغسيل
ورممنا مقام البيت قبل ما نضيغ تذهيبه
لقينا بخدمة البيتين شرف ما واكبه تمثيل
ووصلنا بالامن ميزان حقيقه صعب تخريبه
أمن من رحمة الرحمن ابد ما يحلحله حلحيل
ومن طاوع كلام إبليس بعون الله ندري به
بنينا في بلاد الخير معالم من سواعد جيل
وحلينا مياه البحر وكثرنا مشاريبه
زرعنا ارضنا الصحراء بقروض بمنتهى التسهيل
ونزعنا من بطون الارض ذهب اسود نماري به
صنعنا جودة تسبق مرور الوقت والتحصيل
وتفوقنا وصدّرنا لشرق الكون ومغاريبه
عمرنا القصر والمنزل وأنشأنا سدود حيل
وشبكنا بالطرق اوطان ورفضنا السم وتهريبه
فتحنا في اعالي الشم دروب وصفها تهليل
وأمنا السهل منها من الصعلوك وألاعيبه
تعدينا زمن بلدان وتركنا الشرح والتحليل
وطوينا صفحة الماضي ووصفناها بتجريبه
كتبنا في الفضاء عنوان ومرينا بنجم سهيل
ورفعنا مستوى الانسان بتعليمه وتدريبه
عالجنا كثير امراض وصرنا نقبل التحويل
وكسبنا رأى كل الخلق وش اللي ما انتهى عيبه
حصدنا من حبوب الارض وتبرعنا وزدنا الكيل
ولبينا ندا الملهوف ووصلنا مطاليبه
سمعنا صرخة المنكوب ومسحنا دمعته تدليل
وتعاونا ولاة وشعب لدحر الظلم ومناشيبه
حفظنا المعتمر والحاج من المنفذ إلى الترحيل
واكرمنا الذي خالف وتحملنا اكاذيبه
رطبنا لهيب الشمس وبلل جوها تبليل
لاجل حجاج بيت الله تهنى بعد ترطيبه
ركزنا للحجيج خيام تقاوم شعلة التشعيل
وكسرنا الوقت كل الوقت وتناسينا متاعيبه
لنا في عصرنا الزاهي سباق الهجن ولز الخيل
تراث من قديم الوقت حفظنا اسمه وتنسيبه
تمسكنا بوقت البن والمسمار وريح الهيل
وشربنا من عطايا الله وطرقنا الشعر ومظاريبه
لفانا من وصفنا بدو وشبع نظرته بالحيل
ولفا ربعه وعلمهم تطورنا وأساليبه
نقشنا في عقول اجيال عدالة محكم التنزيل
وتجاهلنا الذي حاقد وتوطينا عذاريبه
قرينا في جباه الجند كرامة ما لها تبديل
لاجل ارض الوطن نفنى ولا نرضى لها الخيبه
وصفنا دورنا للكل فلا نسمح بشبر العيل
نفادي عن جزيرتنا بدم وسلاح نصلي به
شرحنا قصدنا في السلم لغة واقع بلا تهويل
وحمينا دارنا في الحرب وهدينا نواصيبه
غسلنا قلوب من اختلفوا وشكّل وضعهم تشكيل
ودعمنا بالفعل اوطان وصرفنا من دواليبه
تعهدنا لمن جانا نعجل عودته تعجيل
في وقت كان بعض الناس يخاف الحرب تهوي به
