|
| |
انشد مجرب
|
لحظه تذكرت حلم مر لحظه وراح |
وانا ما احب اذكر الواقع ذكرت الحلوم |
وتفسير الأحلام بعض أحيان موتٍ ذحاح |
والواقع اخطر وانا ما بين يقظه ونوم |
حلمٍ تجاوز متاهات السنين الشحاح |
ذيك السنه والنوايا والمسافه قدوم |
يا زحمة الوقت والدنيا هجاد وصباح |
من قبل أعرفه اهموم وبعد عرفه اهموم |
يا حلم من عايشك ما فيه يوم استراح |
ولا هوب خسران باحلامه يبيع ويسوم |
في وقت ما عاد به فزعه ولا به سلاح |
ما بين ضحك السنون وبين حب الخشوم |
لا شك مهما تذعذع لك هبوب الرياح |
ومهما تجاوزت في دنياك بعض السهوم |
خلك مسافر ولكن المباح المباح |
الحقد ما يسكن الا في قلوب الرخوم |
من يطلب العفو من طيب عطاه السماح |
والا الردى ما يقدِّر طيبين السلوم |
وشلون أفهمك واعطيك الكلام القراح |
والا السعاده عساها في حياتك تدوم |
لا تخدعك فرحة بين الرضا والصياح |
الامر قدام لا تخلق تراه محسوم |
في مهمهية طريقك ما تشوف البراح |
عثعث وجرد الدروب يخالفن العزوم |
انشد مجرب تعلم من جروح الكفاح |
تراك لو تاصل المريخ مانت محكوم |
لكن جميع اتجاهاتك رسوب ونجاح |
يا سرع ما يذكرونك عاشقين العلوم |
لو عسعس الليل والبراق بالعين لاح |
منجوم الايام ما يعرف طريق النجوم |
لا تقول لي ما عليك من العوا والنباح |
لا طحت والله التبطي مانت قادر تقوم |
يا حلم الاقدار وجروح الليال الشحاح |
عساك عن ما حوت بعض النوايا تشوم |
وانا تذكرت والذكرى بعضها مباح |
يا حلم ذيك السنه والله غفور رحوم |
دحيم النومسي
|
|
|
| |
|
