سلام الله سلامٍ للعلوم الطيبة عنوان

وأعرف معزبه والضيف في حكمة معازيبه

وأنا لي صاحبٍ ما ينطق الكلمة بلا برهان

أبا سولف معه والعلم يدري به وانا أدري به

ألا يا مرحباً وأهلاً بقلطة شاعر المطران

تراحيب لها بالصدر تشريقه وتغريبه

وانا يا صاحبي ما نيب مثلك للشعر ميزان

ترفق بي ترى توي غشيم وداخلي ريبه

يدوم الك البقا والطير ما يكفخ بلا جنحان

وانا خابرك صقر وكل صقر له مخاليبه

سبحنا في البحور اللي تضم اللول والمرجان

واخذنا ما نبي والوقت ما تصفى مشاريبه

صحيح الوقت ما يصفى وتعكير الزمان ألوان

وأشوف الخايبه تعجب وهذه والله مصيبه

غدى عند الهزيلة شان والجزله ثمنها هان

وسيف الكذب والتهريج اشوف الناس تغزي به

أشوف اللي تشوفه طال عمرك يالله الغفران

واشوف الناس قامت تبتسم بسنون تركيبه

لو ان اللي بنى البيت المسمى ثبت العمدان

ما شفنا الريح تلعب بين ذرياته واطانيبه

يا كيف الحل والحالة سفينه ما لها ربان

يمشيها الهوى من حيث ما هبت دواليبه

عربها ترقص وتزفن على حس الوتر والدان

يحسبون المعاني صولها من جاب له خيبه

اظن الحل نتركها تهيم بغبة النسيان

عساها من نصيب القيض لا هبت ملاهيبه

لو أن النابغة مخطي ما عود بالرضى حسان

يكفّينا رضى حسان والوقت وتجاريبه

انا خابرك ميزاني وربعك كلهم شجعان

علامك يوم عرّض لك هدفها ما تضحي به

ترى صمتك عن الغاوي وتصديدك عن الخوّان

عذاب للضمير الحي ولا في هرجتك غيبه

أنا مثلت فيك القاف ما مثلت فيه فلان

وطبعي كل مقفي ما الحقه واشذب عراقيبه

نبي نبعد عن المنقود والمشروه مهما كان

ولا نفرح على المسلم ليا كثرة عذاريبه

اجل بنشدك عن فيلٍ يحب مغازل النسوان

تضيق ابه الاماكن والمداخل من لغابيبه

يقول إلهن انا الساحر انا الباهر وانا الفنان

وهو ياكل شنق غيره وكل داري بعيبه

سمعت انه على كبره يحس بعقدة النقصان

مجند له رعاة تمدحه وتقول يا طيبه

لكن الفيل يبقى فيل يوم ان الحصان حصان

وضلع طويق ما كل يبي المرقى يعدي به

ما بين ممسح الريضان وبين ملهي الرعيان

غدى ما للجزاله دور ولا لاهل السنع هيبه

الا يال الزمان الشين الا يا ضيعة الوجدان

نزل في سوق ابن قاسم وكلٍ قال كم هي به

من أول كنت يا هداج تيما تروى الضميان

لكن اليوم جمك ما نذوقه من غثاريبه

لا بد الوقت يكشف من هو الرابح من الخسران

وكلٍ يلتبس له ثوب في قده يصلي به

انا يعجبني الشاعر قوي الحبك والبنيان

الي منه بني بيته يشوقك فن تقطيبه

اجاذبه العلوم اللي تونّس والخفا ما بان

مثل تركي عساه يفوز بالمليون ويجيبه

صفحة الجزيرة الرئيسية

رأي الجزيرة