مشتاقن لخوة كريمين السبال |
اللي على العليا تزيد أشواقها |
ربع مداهلهم على روس الجبال |
تسمو مع أهل المعرفة بأخلاقها |
ما يشربون إلا من الجم الزلال |
الصافي اللي ينسجم بأذواقها |
وترى النشامى معرفتهم راس مال |
والصفقة اللي رابح صفاقها |
على سلوم أجدادهم طبع ودلال |
الطيب كنه ثابت بأعراقها |
هم للخوي مثل الذرا وإلا الظلال |
وهم للعدا نار قوي إحراقها |
ربع يشيلون الحمولات الثقال |
والصعب عن درب الوفا ما عاقها |
حفاظة الأسرار عن قيلٍ وقال |
للسر صندوقٍ حكيم إغلاقها |
والمال قله ما يعذرب بالرجال |
والخلق مقسومة جميع أرزاقها |
وإلا الردي لو جاله أموال وعيال |
ولو غطت أمواله كثير أسواقها |
ما له مع أهل المرجلة أية مجال |
ما دام رجله للردية ساقها |
ونطلب من الله ربنا ستر الحوال |
ويغفر خطايا بالظهر ما طاقها |
وصلوا على محمد عدد وبل الخيال |
وعد السحاب اللي نضا براقها |
سلطان بن سعود بن مفرج أبوثنين |
|
