الوقت يمضى مركبه عكس الأحلام |
والعمر من طرده للأحلام ملّي |
كم راح عام وكم بقى للعمر عام |
يارغبتي عن باقي العمر حلّي |
سلمت واستسلمت له راس وأقدام |
كلّى رضخت لواقع الوقت كلّي |
مير اسمعيني وامسحي دمع الأيتام |
ما عاد يكسر خاطري غير ظلّي |
يا رغبتي دامك على دين الإسلام |
استغفري لله.. صومي وصلّي |
توبي تراني تبت وانزلت الأعلام |
مدام حظي بالشقا واقفٍ لي |
حتى الخيال اللي جمعنا من أعوام |
لامر فكري قلت خله يولّي |
صبح الرجا يتبع هوى ليل الأوهام |
ما غار من شمس الغلا والتغلّي |
تاهت به القدرة ورا جمع الأرقام |
ومن تاه فيه الراي ما يستدلّي |
يارغبتي ياغايتي خاطري شام |
عن حاضرٍ فيه الرجا مستذلّي |
ماللرجا معنى ولاله بعد هام |
ضاعت به الهقوه وأنا ضعت كلّي |
خلف الأسيد |
|
