سلامتك يا سيدي والف لا باس

طهور من قلب(ن) غلاك استحله

يا اللي لك القرآن هادي ونبراس

والمرجله كفّك رسلها يتله

يا ابوي ابو متعب عسى كل الانفاس

تفداك يا اللي فزت بالطيب كله

الابو غالي وانت ابو جملة الناس

يا بدرنا الكامل بعصر الأهله

يا سيد(ن) فوق اصعب الروس روّاس

والمجد لك عاده وفعلك محله

صفوة ملوك العُرب قطّاع الارماس

وزبن الدخيل اللي شقا الوقت مله

سيف(ن) مصقّل بالوغى يقطع الراس

ويشفي الكبود اللي رجت فزعة(ن) له

عزوة هل التوحيد بالسلم والباس

اللي كنفهم كلهم تحت ظله

وعز الضعيف اللي شكا كود الاتعاس

وريف الضيوف المزنه المستهله

ما صر ماله في صناديق واكياس

ولا صك بابه في وجه عالي(ن) له

حلحيل ما ينحال للحلم لباس

وحر(ن) بمخلابه دوا كل عله

وملك قلوب الناس من دون مقياس

واصبح سواد عيونهم منزل(ن) له

فيا رب يا اللي منه ما نعرف الياس

تشفي مليك الدار واهله وخله