أفرح بمعرفة الوجيه المسافير
اللي تنومسني ليا سرت معها
اللي لها شيمه وقيمه وتقدير
معروفة بالطيب في مجتمعها
أهل النقا والصدق والفضل والخير
ربي عن ادروب الخمايل رفعها
بالعقل والحكمه والاحسان للغير
تمشي بحق ولا تضيّع سنعها
أهل الكرم ما هي تحسب المخاسير
سجية بنفوس ما تصطنعها
وأنا ولو بي بعض الأحيان تقصير
نفسي من الدنيا قليل طمعها
شفّي على رب الهدى دايم اسير
أحفظ خطاي من الزلل وامتنعها
واحب شوف البر من يومي صغير
نفس بدوي عزها في ورعها
يا ما حلى مع شرقة الشمس وعصير
شوف الفياض اللي تفاتك ولعها
ريح الخزامى والنفل والنواوير
يبري من الكبد العليله وجعها
ويا ماحلى لما أقبل الليل تشطير
ضو المناره في خوالي وسعها
قرّب لها الماء والخطب والمقادير
والنجر والمحماس وألهب وشعها
وليا استوت جتك الدلال المباهير
الي بهيل وزعفران نطعها
فنجالها يسوى الذهب والدنانير
عند الرجال الوافيه من متعها
الجو هذي والسوالف تعابير
وقصايد جزل المعاني بدعها
انسج فالدنيا ولا به معاذير
لا وقفت يالربع محدن منعها
عبدالله بن شايع الزهيري
