يا مشغل البال..ما للبال همٍ سواك

حقيقةٍ سرها ما عاد يخفا عليك

برّاقها بالمحبة لاح!! باعلى سماك

وشعورها كل ما جاء ينتهي يبتديك

ان جيت اخفّي معالمها كشفها غلاك

وان جيت بافصح غديت بنار هذي وذيك

مراحل الشوق!! فيها عالمي في لقاك

تجاوزت !كل نبضٍ!! في خفوقي يبيك

الروح باحساسها ما تسمع الا نداك

واحساس قلبي بقلبي قبل اجي لك يجيك

داعيك في داخله! واحساس شوقه دعاك

اعذب مراسيل وده ..بالغلا تحتويك

وفي كل الاحوال..تعبير الأحاسيس جاك

والقلب جرحه.. وجرّاحه ما عاد يخفيك

ولا جيتك اعتب ولا جيت اشتكي لك جفاك

جيت اتباهى بودي لك وما شفت فيك

من الصفات الاصيلة!! في عطاك ومداك

اعطاني أجمل صور لاسمى المحبة لديك

انت الوفا الصادق اللي عاشقه ما نساك

ميثاق صدق المحبة للشموخ يحديك

وما هوب انا اللي عطيتك الله اللي عطاك

قلبٍ وفا لك ولا لك في وداده شريك

اعطاك صدق الشعور.. اللي لقا في وفاك

ومشاعرٍ مملكتها صرت فيها مليك

والخير طلة صباحك والسعد في مساك

والفرحة العارمة في خاطري! تحتريك

على ضفاف السحاب..اللي سحابه رواك

جيت اتسابق مع قلبي بشعري عليك