زياد بن حجاب بن نحيت شاعر مميز جزل العبارة في هذا النص يأتي زياد شامخا بنص جمع بين الروحانية والإبداع:

كم راح من عمري وانا ودي اتوب

ولولا الهوى والنفس كان امس تايب

عشرين عام أمني النفس يا ايوب

لين اكتشفت اني مع الوقت شايب

راحت حياتي بين طالب ومطلوب

ولي خاطر(ن) لو طبت ماهوب طايب

واخاف من يوم به الموت مكتوب

لا حولوا بي بين عوج النصايب

في منزل مظلم عن الناس محجوب

محجوب حتى عن نسيم الهبايب

وصار الكفن يايوب يغني عن الثوب

وفارقت ربعي والاهل والقرايب

ما عاد فيها جاه وأموال وسلوب

ولا عاد فيها حب خشم وطلايب

ولا عاد حولي شمر ولا به حرووب

انا وملائكة الرضاء والعقايب

خدعني التسويف واغرتني دروب

من يامن الدنيا وغدر النوايب

يالله يا فارج على كل مكروب

يا واحدٍ بامرك تهون المصايب

يا من تقلب بين اصابيعك قلوب

خلقتها من بين صلب وترايب

يا غافر لمن جالك وكله ذنوب

عبدٍ ضعيف وجاك تايب ونايب

يا رب لو قلبي صخر عندك يذوب

يامن لهيبتك الجبل خرّ ذايب

اتوب ثم اعود واعود واتوب

ماهي عجيبه وانت رب العجايب

من المهد لين اللحد وقتي محسوب

ما ضاع شي وما بقى شي غايب

يارب مالي غير رحمتك مطلوب

من لي سواك ان جيت يارب تايب

كم راح من عمري وانا ودي اتوب

ولولا الهواء والنفس كان امس تايب