يا فرحهٍ فاقت جميع التصاوير
فرحه سلامه سيدي نسل الاحرار
فرحه وطنا ما تقاس بمعايير
وشعب السعوديه تباشر باالاخبار
غنى الوطن والشعب زف التباشير
واستبشرت كل المناطق والاقطار
يامرحبا وعداد نبت المزاهير
وعداد ماهلت مخاييل الامطار
ياراعي الوقفه زبون المخاسير
لعل عمرك من طويلين الاعمار
انته ذرانا كان هبت معاصير
وحنا جنودك نلحق النار باالنار
هذا ابو متعب سليل المناعير
صقر العروبه حاكم الدين والدار
مده يمينه في الليال المعاسير
تفرح قلوبٍ همها في الصدر ثار
يابو اليتامى والضعوف المكاسير
ويامسعف شعوبٍ عليها الزمن جار
ويامعتق رقابٍ تشوف التعازير
انت الأمل في الوقت لاصار غدار
وياعون من صكت عليه التفاكير
وياعون من دمعه على الخد مدرار
اشواق شعبك جتك منا مصادير
دونتها ياسيدي وسط الاشعار
ياسيدي ياجعلها لك تياسير
بمر الكريم الواحد النافع الضار
سلامتك مطلب جميع الجماهير
وفرحه قدومك عانقه شوف الانظار
عبدالله الشلاحي
