بين عبدالله بن زويبن وعبد الله بن عون
مشينا من العارض على صافي الماطور
نهار السفر من لايدنيه مادنا
عسى الله يعديه العواكيس والعاثور
بنا يم ابو سلمان منعوب ومعنا
عزمنا وحنا من محبه وطيب شعور
عليه الحرير اضعف سلوكه يجرنا
يسوقه صبيٍ من عتيبة طويل شبور
يطوف المواتر كلها مايطوفنا
وعلى الباب الأيمن شاعر عتيبة المشهور
ابن عون في طاروقه المنفرد غنا
وانا والشويب نحسب ان اللحن مكسور
نقول اعدل الطاروق واثر البلا منا
غريبٍ علينا لاهجيني ولا مجرور
وقعدنا نغرد خارج السرب لاهنا
على الدبك مثل المستجدين بالطابور
وتعبنا وعفنا واستخرنا وهونا
وقعدنا نعاين فالنبيرات والديكور
تقل فيه شيٍ فالغماره مهولنا
لين انا نسفنا نسفت الموج للبابور
بريدة وسكان المليدا على ايمنا
ولقينا جسورٍ تنطوي في بطون جسور
وعلى واحدٍ منهن على الرس ميلنا
ولقينا الحويفي واقفٍ عند باب السور
نطحنا بكلمة مرحبا حين حولنا
وقلطنا وهو يقبل ويقفي كما المسعور
يشعشع وعده بالتراحيب ياكلنا
وعلينا عياله يدرجون اشقرٍ مذعور
وراه المداخن كل لحظة يمرنا
وسمعنا وسولفنا وجا للمثايل دور
وسمعنا طرايف شعرهم واسمعوا منا
وقلطنا على السفره عسى خيرهم مكثور
واكلنا من اسمان المفاطيح لين انا
سمحنا وعودنا على المجلس المعمور
وقعدنا نسولف ساعتين وتسهلنا
لأهلنا وجينا يوم بين شعاع النور
تبين وشفنا والظلام انجلا عنا
ونبيها زيارة دايمة كل ست شهور
يزوروننا ونزورهم كان خلنا
الايام لو ماهيب دايم فرح وسرور
تعشن محمد والصحابة ماهو حنا
يقول الخلاوي بالمثل قدمنا بعصور
نعد الليالي والليالي يعدنا
وهذا رد الشاعر عبدالله بن عون
على وسق جيبٍ كنه الريمي المذعور
رفعنا الهجيني يوم فوقه توازنا
انا والزميل منيف والمنهي المامور
دعينا واجبنا لابوسلمان واذعنا
بعد مافهق صلبوخ بادرت بالميسور
نغني بيوتٍ من قصيدٍ ماهوب النا
وابو بدر جاوبنا ولا بان منه اقصور
ثلاثة ورابعنا رفض لايعاونا
وابو بدر مثل امقدي الخور بالمقهور
ليا شافنا تهنا الطريقه تماكنا
ويقول انت قدامي وانا دوب بالناظور
اشوفه وهو قدمي على مثل ماكنا
لاشك الرها ماحط للشك عنده دور
عقيدٍ لحاله ماغزا معك يامهنا
هو الشاعر الكابر وانا الشاعر المكبور
وكلام الصراحة من كمالة مراجلنا
لو الشعر له لجنة عدالة وله دستور
لابوبدر جزلات الجوايز تعدنا
لاشك نحمد ربي على وضعنا المستور
لجان القصايد مثل لجنة مزاينا
أرى شعر بعض الناس رشٍ بدون انذور
الى مره العاصوف شاله ولا ثنا
على جرته تلقى وساع الفجوج دهور
الى جا الفياض الضامية ماسقاهنا
كلامٍ رخيصٍ لو يصفق له الجمهور
ولو شجعه ماراح منا ولا منا
يحور ويدور بفكرته مايجي المحضور
عن المنهج المعتاد ماهون ومثنا
نجامل ولا نشره على العمي هن والعور
الى مارضى اللي قبلنا كيف يرضنا
ومزار الحويفي نعتلي به خشوم القور
وعلى ضلع ابان وما تبين تبينا
هشاشٍ بشاشٍ كل ماحصله مدمور
ودماره على الخرفان والهيل والبنا
عسى اللي سواته من صدوف الدهر ماجور
ويمد بحياته ويحمانا ويمنا
يابو بدر ماعني وعن صاحبي مذخور
تعجرف علينا وانت بالطيب ضامنا
انا والشويب كلنا في رضاك حضور
نجاملك وانته ياجب انك تجاملنا
نقدرك ونراعيك ونرد لك بالشور
ومدامك على هالحال لاعاد تامنا
