أقبل الخير والتمّت نصوبه

و البشاير بالأفواه اتعلا

والسعد بيننا هبّت هبوبه

من سمع بالخبر رحب وهلا

نورت نجد ياصقر العروبه

يوم صافحتها والشر ولا

الوطن فرحة قدومك تجوبه

كل شبر من ارضه لك محلا

يحتفل فيك واخضرّت دروبه

والوجيه الفرح فيها تجلا

صادق الحب ما شيٍّ يشوبه

ثابت الجذع وعذوقه تدلا

جعل يجزل لك الرب المثوبه

ويحفظك خالقك عز وجلا

يامليكٍ به الروس معصوبه

عن قضايا العروبه ماتخلا

وين ماراح لأرض رحبوا به

هو ذرانا وهو زبن المجلا

يلبس العطف كنه لبس ثوبه

بالتواضع وبالصبر يتحلا

يبني المجد طوبه فوق طوبه

طيب سيره ووجهٍ مسفهلا

جعل عمره طويل ومن ينوبه

ومرحبا عد من كبر وصلا

يوم جانا وجيّته محسوبه

تفرش الأرض له ورد وفُلا

غنّو الناس باسمه وهتفوا به

لاتملّ الصدور ولا تكلا

لو مدحه الملايين وحكوا به

لو يقولون يكفي قلت كلا

من يورّد بيوت المدح صوبه

جته شرد القوافي ماتغلا

جيّته عيد والكل فرحوا به

عند شعبٍ لشوفه ما يملا

مرحبا فيك يا صقر العروبه

عد مابان نجم وما تعلا