أنا أكره الخيّب لو إنه قريّب

ويعجبني الطّيب لونه عدوي

أحب فعل الطيب من كل طيّب

وأعشق أفعوله من بداية نموي

ولا الردي دايم سيوبٍ مسّيب

وعندي مايسوى شي مما يسوي

لو هو كبير السن راسه مشّيب

عن المراجل والرجال أمتلوي

العيب في قربه وشوفه يعيّب

خبل على ما قيل عقله مهوي

عساه دايم في غيابه مغيّب

شوفه يعكر لي مزاجي وجوي

والا زبون الطيب قربه يطّيب

الجود شبعانٍ منه ومتروي

ما هوب عن فعل الجميل متهّيب

مكانته عليا... وصيته مدوي

واليا طلبته فزعته ما يخيّب

وعلى العلا يرفع علوه علوي

ترى الرجال أنواع طيّب وخيّب

توي دريت من التجاريب توي