يا سيدي والله إن شوفتك تكفينا
ويا سعد عين تشاهد ميلة عقالك
ولا همنا كم تبي من المال تعطينا
لا والذي حط وسط القلب منزالك
مبطي وخيرك يابو متعب مغطينا
يالوالد اللي تخاف الله بعيالك
يالوافي اللي بثوب العدل تكسينا
وليا اشتكى واحدٍ منا شغل بالك
من قبل سود الليالي بهم تمسينا
نطحتها يالحنون بحالك ومالك
تقضي لنا الحاجة وعطفك يراعينا
الله يجزاك عنا بطيب أعمالك
مفتوح مجلسك وبوسطه تقهوينا
ولا صكت أبوابه بوجه الذي جالك
وليا وصلناك بالبسمة تحيينا
رحبت فينا وعلينا يدور فنجالك
تنده لنا واحدٍ واحد باسامينا
وشيباننا يجلسون بكرسي قبالك
تحضن يدينا وتسمع كل شكاوينا
وتنصت لنا بكل عرق حي بأوصالك
عطفك فراشٍ لنا وطهرك مغطينا
وشلون نلحق جزاك بطيب أفعالك
ومن لا عرف وش سبب صدق الولاء فينا
واستغرب إخلاص شعبٍ يعشق ظلالك
مذهول لأنه يشاهد من حوالينا
كم ديرة أمنها ضايع ومتهالك
قله يجي ينام لو ساعة بأراضينا
وراح يعرف ليه نعشق ميلة عقالك
طلاع الزعيزع
