اطــــرد هواجيــسي بنظــم القصــايد

وارتــــاح لا منــي نظــمت القصــيده

واختار من زين المثايل فرايد

اشــفق عــلى الجــزله واحب الفــريده

عندي خبر اللي ورى الناس كايد

من قبلنا قالوه واليوم اعيده

عمــري قضــى بين الرجــاء والوعــايد

ورجواي بالمعــبــود رازق عــــبيــده

رب المــــلا حكــمه على الخــلق ســايد

نريد والله فاعلٍ ما يريده

اهموم قلبي دارسات وجدايد

ولا راحت الأولى بدلها جديده

تحدنا شيماتنا والعوايد

ولا خــــير فــي رجل بلــــيا عقــــيده

والرجــل يعرف موقفــــه فالشــــدايد

وقفات طيبه له تزود رصيده

والا الرخــوم رخوم مــا مــن فــوايــد

لا هــيــب فــايتــك ولا مســتفــيــده

اشفق على رفقة وسيع البنايد

اللي ربوعه شوفهم يوم عيده

رجل المواقف فالمهمات قايد

عزمه قوي وأرياه دايم سديده

يفداه نمام هروجه سرايد

فظــهور خــلق اللــه ســيوفه حــديده

من الزمــــن عفــنا وشــفنا النكايــد

الغوج يربط والجحش فك قيده

ياللي تحســب القــل لــوم ونقـــايد

كــم من فقــيرٍ عــاش عيشــه سعيده

والنذل لو عنده ترى المال زايد

غنــاة مثــله هي ترى اكبر نقــيده

الدين فرقاب النشامى قلايد

والمال لو جانا يدينا تبيده

والله لو نرقد بليا وسايد

الذي ما ترضاه نفسٍ عنيده

والوقت لو فينا طعونه لهايد

ما نشتكي جــــور الطعون اللهــــيده

نصــبر اللين أنحــط وسط اللحــــايد

حياة عزٍ أو وفاة شهيده

وصلاة ربي عد طبع الجرايد

على نبي الحق صفوة عبيده