شعر - النادرة
مرثية في صاحبة السمو الملكي الأميرة/ منيرة بنت سلطان بن عبد العزيز رحمها الله وأسكنها فسيح جناته
ياصبح ياللي جيتنا بكل الاحزان
هزيت بأحزانك قلوبٍ كثيره
قالوا توفت في الفجر بنت سلطان
وكلٍ يعزي في وفاة الأميره
وشفت الطهاره من وراء بيض الاكفان
وصلّوا على منيره جموعٍ غفيره
راحت منيره بنت ذربين الايمان
اللي لها في المجد اسمٍ وسيره
بنت لها في نايف العز عنوان
وافعالها بالطيب في كل ديره
أم اليتيم اللي بلا ربع واخوان
وعز الضعيف اللي يدينه قصيره
يمينها كم مدة الخير باحسان
تعطي وتنفق بالعلن والسريره
اخذوا على قولي دلايل وبرهان
يوم الزمن شره سبق نو خيره
نخيتها عبر القوافي والاوزان
وارسلت مرسولي ونفسي كسيره
وجاني الجواب اللي مسح دمع الاعيان
وتفرجت بعده ظروفٍ عسيره
وشلون ماتعطي وهي بنت سلطان
اللي يمينه با لجزايل شهيره
كريم سبلاء بالوفاء طير حوران
شبيه غيثٍ لا تزبّر غثيره
سلطان سلطان الكرم عالي الشان
كفّه على لطم المعادي شطيره
تعيش في خيره بلادٍ واوطان
يالله عسانا ما نتبدل بغيره
يالله ياللي عالم كل ماكان
يامقدر ليعقوب يلفي بشيره
تجعل منيره بين روحٍ وريحان
ومع النبي ويا الصحابه خشيره
وكتابها يارب تاخذه بأيمان
وفي جنة الفردوس تسكن منيره
