يا هجوس الليل أبي وقت مستقطع
كود فكري يقدر يلملم أوراقه
يا مساء ليل الثلاثاء ما بي مطمع
منكوي بالحب وظروفي دقاقه
لا تقول أصبر ترى القلب ما يسمع
مل صبرٍ سرمدي وسبَّب إرهاقه
والله أن الهم فيني لقي مرتع
في صحاري ساحتي نوَّخ نياقه
لين صارت دمعتي أربعٍ وأربع
موقفٍ صعبٍ على القلب ما طاقه
فرصة العاذل علينا يدق إصبع
يعلن الفرحة من أقصاه وأعماقه
وآ عذابي من غيابٍ ضرب وأوجع
ومن نحبّه صعب نصبر على فراقه
والله إني من غرامك عجزت أشبع
أنت يا همس الغلا وأنت يا أشواقه
آه يا عينٍ على البعد ما تدمع
وآه يا روحٍ على الهجر مشتاقه
الشاعر: محمد الخربوش
