قالوا اكتب للبلاد أحلى قصيد

واصدح بصوتك وسمّعنا لحن

قلت لو كان اكتب بدم الوريد

اعتبر نفسي مقصّر يا وطن

يا وطن حبك وسط قلبي يزيد

يا وطن في وسط روحي لك شجن

كيف عنك أغيب وإلا ابعد بعيد

وأنت حبك في معاليقي سكن

يا وطن والله العظيم أنت الوحيد

اللي ما لرواحنا دونك ثمن

وسط قلب العود والطفل الوليد

جارياً حبك مع الدم في البدن

وأنا لو ماني عميد ولا عقيد

للوطن جندي مجند للوطن

ادعس الاخطار فاليوم الشديد

دون داري ما يغمّض لي جفن

احيا به وأموت من دونه شهيد

وافتديه ولا على روحي غبن

يا عسى من راده بفتنه وكيد

طول عمره في عذاب وفي وهن

والله يحفظ صاحب الرأي الرشيد

الحكيم العادل الشهم الفطن

أبو متعب يا عسى عمره مديد

والله أيجنبه كيد أهل الفتن

اللي كل الشعب في عهده سعيد

عم جوده بالقرايا والمدن

دام أبو متعب وسلطان العضيد

والبلاد بنعمه وخير ويمن

والسعودية بملبسها الجديد

للعلا تختال من فوق المزن

كل يوم وكل عام وكل عيد

وانته بخير ورخا يا اغلى وطن

ضيف الله بخيت المتعاني