يالله يا المطلوب يا خير مطلوب

يا واحدٍ يرجون عفوه عبيده

يا حافظٍ يوسف على أبوه يعقوب

عقب الغياب اللي سنينه مديده

مشفي نظر يعقوب من ريحة الثوب

من ريح يوسف يوم جوبه مديده

انت الذي تجبر عزاء كل مصيوب

أجبر عزاء كل العرب فالفقيده

أجبر عزاء حكام وأوطان وشعوب

في فقد أميرٍ كل الامه تريده

في فقد أبو خالد سند كل منكوب

سلطان ريف اللي قليلن رصيده

ريف الفقير اللي من المال مسلوب

وحلاّل قيد اللي طوى الوقت قيده

خيره على اليتمان والرمّل مسكوب

ويطيب من طيبه رجالٍ عديده

سموه راع الخير والخير مطلوب

ساس الكرم وأصله وابوه وعميده

حكيم وسياسي وعادل ومحبوب

وغيث الفقير اللي حياته زهيده

الله يغفر كل ما له من ذنوب

عساه فا الجنه وروحه شهيده

لعل أبو خالد عن النار محجوب

عساه في خضر الجنان المديده

واللي جرى من والي الكون مكتوب

الله بخلقه فاعلٍ ما يريده

والعمر له مدّه وله وقت محسوب

في دبرة اللي كل الأرواح بيده

والموت حق ولا لنا غيره دروب

ولا بد كلٍ عابرٍ خط سيده

هاذي حياة الناس راحل ومجيوب

كلٍ من الدنيا لزومٍ شديده

والأمل فالله ثم في قاضي النوب

يدوم أبو متعب ويسلم عضيده

واخوانهم وافين في كل ماجوب

من طيبهم يطيب الابن وحفيده

العز قايم ما انحت الشمس بغروب

وإن غاب نجمٍ جاء مكانه نديده

نطيب للأصحاب مع كل مندوب

بالمال والفزعه والارياء السديده

صديقنا يطيب له كل مشروب

ومن خيرنا نعط الصديق ونزيده

وعدونا في كبده الحر مشبوب

نشب في كبد المعادي وقيده

نسق العدو سمٍ على كبده يذوب

وناطا على رؤوس العداه العنيده

تمت وما يجري من الرب مكتوب

تدبير خلاق البشر في عبيده

ونبقى بخير وبيرق العز منصوب

الرأس عالي والمواقف حميده

الشاعر- بداح محسن عبود السهلي